Fyndnasti maður Íslands vs. Þjóðkirkjan

Ég stytti mér stundirnar áðan með því að gúgla nafnið mitt, ekkert merkilegt kom því miður. Í stað þess gúglaði ég "fyndnasti maður Íslands" og það kom haugur af niðurstöðum, aðallega fólk sem var að blogga um hversu léleg keppnin og keppendurnir væru. Ég las í gegnum meirihlutann af þessum færslum og eftir hverja síðu lækkaði sjálfsálitið mitt. Það er nefnilega svo skemmtilegt að segja frá því að ég er einmitt keppandi á úrslitakvöldinu, 6. apríl eða eins og flestir vilja kalla, heilagasta dag ársins þegar allir eiga að hanga heima og vera þunglyndir, það er allavega það sem kirkjan okkar blessaða vill meina. Ég hef aldrei verið jafn ánægður með að vera hvorki skírður né fermdur. Það er víst bannað að vera með skemmtanahald á þessum degi, allt í lagi, en þó er tekið fram að leiksýningar séu undanskildar, hvað er uppistand annað en leiksýning? Þarna koma menn fram og eru með einleik, afsakið, en var Hellisbúinn ekki leiksýning? Svo ekki sé minnst á úrslit x-factor(mesta auglýsingabetl norðan Alpafjalla), kirkjan og ég erum hinsvegar á sama máli þegar talað er um x-factor og skemmtanahald, samkvæmt orðabókum þýðir orðið skemmtun að eiga góða stund eða eitthvað sem styttir manni stundirnar og samkvæmt mér flokkast x-factor ekki undir það.

Merkilegt þykir mér þó að allt þetta veður hafi verið gert vegna þessara ummæla sem Oddur Eysteinn lét hafa eftir sér. „Ég er viss um að hann(Jesús) hefði komið á keppnina sjálfur hefði hann ekki verið örlítið bundinn." Þetta þykir mér einstaklega fyndið, get svo sem skilið það að allar þær 83 manneskjur sem eru trúaðar hér á landi hafi fundist þetta móðgandi.

Ég get hins vegar ekki skilið af hverju fólki er ekki sama hvort þessi keppni sé haldin á föstudaginn langa eða ekki. Það eru svo fáir á þessu landi sem virkilega hafa efni á því að geta kallað sig kristna að það er varla fyndið. Að auki er trúfrelsi hér á landi og mér finnst það asnalegt að það séu enn til trúarlegir frídagar. Eins og ég sagði eru afar fáir Íslendingar kristnir(þ.e.a.s. eins og biblían vill meina. Nú eiga "kristnir" eftir að mótmæla þessu, sjáið til, þetta er einmitt dæmi um hversu kristin trú er ósamkvæm sjálfri sér, það er allt í lagi að brjóta allt sem stendur í hinni heilögu bók en svo þegar einhver grínast með Jesú verða allir vitlausir!) og mér þætti ögn venjulegra ef fólk mótmælti keppninni ef hún væri haldin á fullveldisdaginn 1. desember, sem er einn mikilvægasti dagur í sögu Íslands og er í dag hunsaður sem frídagur.

Einhver netverji talaði um það að hann vildi vera látinn í friði á föstudaginn langa því hann ætlaði að syrgja Jesú. Ég er ekki frá því að þetta séu heimskulegustu orð sem ég hef lesið í langan tíma. Jú jú, vinur minn, slepptu því bara að mæta á keppnina! Er einhver sem syrgir af alvöru á föstudaginn langa? Snýst þetta ekki frekar um að vera pirraður yfir því að hafa gleymt að kaupa sér sígarettur eða fara í ríkið? Sumir kalla það kannski að syrgja.

Góðar stundir og hafið það náðugt!

Kári Björn, keppandi og klámpervert í keppninni um fyndnasta mann Íslands

 

„Fáránlegt“ að úrslitakvöld Fyndnasta manns Íslands sé á föstudeginum langa